Z leżnotë 20-ti roczëznë smiercë Jana Trepczika ùczniowie ze Szkòłë Pòstawòwi z Miszewa, dze nen wiôldżi Kaszëba je patronã wëbrelë sã na wanogã jegò szlachã. Ùczniowie mielë leżnosc bëc kòl chëczë dze wëchòwôł sã Trepczik, a wic w Strëszi Bùdze, kòl Mirochòwa. Pòtemù zajachelë do Mirochòwa do szkòłë, dze pòbiérôł pierszé nôùczi. Widzelë jak dalek mùszôł piechti chòdzëc do szkòłë. Pòsobnym môlã bëło Sankuarium Królewi Kaszëb w Swjónowie, dze ù stóp Matinczi òdspiéwelë piesniã „Kaszëbskô Królewô” , jaką Trepczik napisôł na kòrunacjã w 1966 rokù. Tam na smãtôrzu leżi téż jegò syn Mestwin, chtërën ùmarł podczôs wòjnë jakno môłi knôp, czej Trepczik béł w Sjónowie kasjérã. Dali droga prowadza do Kartuz, dze Méster Jan ùcził zarô pò zakùńczenim studium dlô szkólnëch w Kòscérznie, bëła to Pòdstawòwô Szkòła nr 1. Stądka pò rokù òstôł przeniosłi do Miszewa, dze bez séme lat béł czerownikã szkòłë. To je jediny plac na Kaszëbach dze Trepczik je patronã i całô spòlezna je z tegò baro bùsznô. Slédnym môlã ti wanodżi bëło Wejhowò, dze na jegò grobie ùczniowie i szkólny złożëlë kwiatë i òdspiéwelë „Kaszëbską Królewą”. Bëłobë jesz wiele môlów do òbôczeniô, jak chòcbë Mùzeùm Pismieniznë i Mùzyczi Kaszëbskò-Pòmòrsczi, szkòłë w Wejrowie dze ùcził pò wòjnie i prowadzył chùrë, jednakò na wszytkò nie sygło czasu. Bez całą rézã w autobùsu spiéwóné bëłë piesnie Trepczika. Ùczniowie belë rôd, że terô dlô nich, wies Strëszô Bùda i wiele jinszich placów na Kaszëbach stało sã blisczi i sparłãczoné z jich patronã.
Elżbiéta Prëczkiwskô